O BNG fleta buses para animar á xente de Lugo a protestar contra Altri na Pobra do Caramiñal

O BNG de Lugo animou á veciñanza a unirse á mobilización convocada para este sábado na Pobra do Caramiñal para rexeitar a implantación da fábrica de fibras textiles a base de celulosa que promove a multinacional lusa Altri, a través da sociedade Greenfiber, no concello lugués de Palas de Rei.

O portavoz do BNG na capital lucense, Rubén Arroxo, destacou a importancia desta mobilización "unha vez coñecidos os informes favorables da Xunta de Galiza para este proxecto". Dixo que o partido nacionalista continúa "traballando desde as rúas e as institucións para frear un proxecto que será lesivo para Galiza e tamén para Lugo, dado que a contaminación da planta chegará ata a cidade".

A "implantación da macrocelulosa de Altri non só afectará negativamente ao medio ambiente, senón que tamén comprometerá o futuro económico e social de todo o país".

buses dende o centro de Lugo

Para facilitar a participación dos lucenses na manifestación, haberá un servizo de bus para acudir á Pobra do Caramiñal, que partirá desde o Edificio Sindical de Lugo ás 9:00 horas deste sábado, 22 de marzo.

Desde o primeiro momento, dixo Arroxo, o BNG deixou clara a súa frontal oposición á implantación desta industria, que supón "un grave risco para os recursos naturais, especialmente a auga, ademais de poñer en perigo o modelo económico sustentábel e ligado ao territorio que defende o partido".

Asimesmo, lembrou que o BNG continúa a traballar nas institucións, con diversas iniciativas tanto no Parlamento de Galicia como no Congreso e no Senado, no Parlamento Europeo e en deputacións e concellos para reclamar transparencia no proceso e "demandar que se escoite a voz das veciñas e veciños que rexeitan de maneira maioritaria este proxecto".

"Defendemos dun modelo produtivo respectuoso co medio e que priorice os sectores estratéxicos galegos, no canto de favorecer proxectos especulativos que comprometen o futuro do noso país" destacou Arroxo.