O Pazo rexuvenece: o templo do baloncesto de Lugo terá un moderno marcador central

Lugo é unha cidade de baloncesto. Recoñecémolo mesmo aqueles que baixamos cada quince días ao Anxo Carro para animar ao noso equipo de fútbol, coa esperanza de que algún día regrese á segunda división. O Breogán ten un exército de seguidores e o Pazo é o seu fortín. Tamén é a casa doutros equipos da capital luguesa, pero ese recinto precisa de melloras. Non hai moito, problemas de condensación que xa foron solventados obrigaron a suspender un partido da ACB. 

O caso é que a Deputación de Lugo, a Vicepresidencia da institución, que dirixe o nacionalista Efrén Castro, elaborou un programa para mellorar e modernizar as instalacións do Pazo e unha das actuacións previstas, segundo acaba de anunciar, é a instalación dun marcador central, para que os afeccionados podan ver mellor as vitorias dos seus equipos.

"Nas últimas semanas recibimos as conclusións do estudo sobre a capacidade de carga da cuberta, que confirma que pode instalarse un peso puntual máximo de ata 2.800 kilos. Segundo as empresas proveedoras consultadas, isto é suficiente para un equipamento moderno, de última xeración, que incorpore as últimas prestacións e innovacións", precisou Efrén Castro.

Por iso, adiantou que "a partir do estudo e da información recollida, os servizos provinciais están traballando nos pregos para licitar o contrato de compra e instalación do videomarcador. O obxectivo é realizar a instalación de cara a vindeira temporada".

Estudo de carga

O estudo de carga da cuberta, realizado pola empresa L&M, requiriu un minucioso traballo a partir do proxecto de execución redactado polos arquitectos Jorge Zapata Suárez e Luis Gorozarri Del Vale para a construción do Pazo.

Realizadas as comprobacións, iniciouse o traballo de estudo que determinou que a carga puntual máxima que se pode suspender da estrutura da cuberta non poderá exceder de 2.800 kilos repartidos en catro apoios coincidente con catros nos situados na capa superior da maia.

Rehabilitación da cuberta

Ademais da instalación deste equipamento, a Vicepresidencia da Deputación de Lugo ten en marcha a contratación da obra de rehabilitación integral da cuberta do Pazo. A intervención suporá a aplicación dunha membrana impermeabilizante de poliurea sobre a superficie da cuberta, que suma 8.500 metros cadrados.