Retiran 450 kilos de lixo das arquetas da Praza de Abastos de Lugo

A edil de Participación, Cristina López, informou de que o Concello levou a cabo este xoves un operativo especial de limpeza na Praza de Abastos, que rematou coa retirada de máis de 450 kilos de residuos: como cascas, restos de peixe, envoltorios, mallas, plásticos ou etiquetas das arquetas ubicadas no soto.

Cristina López fixo un chamamento aos distintos praceiros e ás asociacións que din representar os negocios da Praza e do Mercado "para usar as instalacións de xeito responsable, garantindo o benestar tanto dos usuarios como dos negocios que se ubican aquí".

López afirmou que esta "importante cantidade" de residuos estaba a provocar malos cheiros na Praza.

os  desaugues non poden ser usados como colectores

A edil de Participación lembrou que os desaugues non deben ser usados como depósito de refugallos. O goberno de Lugo puxo en marcha o pasado 24 de maio un servizo de recollida de residuos para os resíduos orgánicos, con colectores refrixerados que impiden os malos cheiros e propician unha xestión responsable e eficaz da reciclaxe, precisou a concelleira.

 Ademais, lembrou, a instalación conta con colectores suficientes para a reciclaxe de envoltorios, elementos plásticos e outros residuos.

Insistiu en que o novo sistema de recollida de residuos de carnicería e peixería permite realizar unha mellor xestión dos resíduos específicos destes sectores e avanzar no bo tratamento dos restos que se xeran nestas instalacións, "reducindo o impacto ambiental de toda a cidade, que é un dos obxectivos da Tenencia de Alcaldía á hora de planificar o traballo", afirmou Cristina López